Inissat taakku 70-it nutaat, Pillaasarnerup aaqqissuussivigeqqinneqarnera aamma pinerluttunik isumaginnittut 2026-imiit 2030 ilanngullugu aningaasaqarnerat pillugit isumaqatigiissummi aalajangerneqartut agguarneqarnerisigut, Kalaallit Nunaanni eqqartuussiveqarnermi inissat amerlineqassapput, taakkulu massakkut siunissamilu inissat amigaatigineqarnerannik unammilligassat isumagissavaat. Immikkut ittumik ilungersunartunik pinerluttuliornernut pineqaatissisarnerup killiffiisa qaffanneqarnissaat pillugit Naalakkersuisut kissaataat, inissat amerlineqarnerisa inissaqartissagaat tamatuma peqatigisaanik naatsorsuutigineqarpoq.
Suliniutini piviusuni Nuummi Inissiisarfiup annertuumik allineqarnera aamma Qaqortumi Sisimiunilu inissiisarfinnik nutaarluinnarneq sananeq ilaatinneqarput. Nuummi inissat nutaat 34-iusut immikkoortortani ammasuni inissanik 16-inik aamma tigummigallarneqartussanut immikkoortorami matoqqasumi inissanik 18-inik agguarneqarput. Qaqortumi inissiisarfik nutaaq, inissanik allanngorarsinnaasunik, pillaatissanik atuinissamut aqutsivinnit assigiinngitsunit atorneqarsinnaasunik, 30-inik inissalik sananeqassaaq, tamatumalu peqatigisaanik inissiisarfik minnerusoq massakkut inissiisarfiusoq atorunnaarsinneqassaaq. Sisimiuni inissiisarfik nutaaq 25-inik allanngorarsinnaasunik inissalik pilersinneqassaaq, tamannalu taamatuttaaq massakkut inissiisarfiup atorneqartup, ullumikkut killilimmik tigummigallagassanngortinneqartunut immikkoortortaqartoq, atorunnaarsinneqarneranik kinguneqassaaq. Piffissami ikaarsaariarfiusumi Nuummi inissiisarfitoqqami utaqqiisaagallartumik inissat 12 pilersinneqassammata taakkununnga aamma ilaavoq, taakkulu ataavartussamik aaqqinnerit piareerneqarnissaasa tungaanut, artukkerneqarnermi ikiuutaasussaapput.
Inatsiseqarnermut ministeri Peter Hummelgaard ima oqaaseqarpoq:
– Pillaasarnerup aaqqissuussivigeqqinneqarnera pillugu isumaqatigiissummut uiggiullugu, Kalaallit Nunaanni inissiisarfinni inissat malunnaatilimmik amerlineqarnerat pillugit qallunaat naalakkersuisui aamma Naalakkersuisut aaqqiissutissarsiornertalinnik oqallisiginnissimapput. Oqallisiginninnerit Kalaallit Nunaanni Pinerluttunik Isumaginnittut massakkut unammilligassaasa aaqqinneqarnissaannut alloriarneq pingaaruteqartoq malunnartippaat, tassami inissiisarfinni piusuni inissaqartitsiniarneq sivisuumik artukkerneqarsimavoq. Taamaammat pillaasarnerup aaqqissuussivigeqqinneqarneranit inissiisarfinni inissat nutaat taakku piviusumik piviusunngortinneqarnissaat massakkut isumaqatigiissutigigatsigu nuannaartorujussuuvunga.
Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen ima oqaaseqaateqarpoq:
– Inissaqartitsiniarnerup annertusarneqarnera pillugu inaarutaasumik isumaqatigiissut massakkut naammassineqarmat, Naalakkersuisut naammagisimaarinnittorujussuupput. Inissat nutaat katillugit 70-it malunnaatilimmik inissanik, massakkut siunissamilu pisariaqartinneqartunik, amerliliipput. Qallunaat inatsiseqarnermut ministeriannik Naalakkersuisut pitsaasumik oqaloqateqartarsimapput. Inissat Qaqortumi, Nuummi Sisimiunilu inissinneqassasut isumaqatigiissutigivarput. Pinerluttunik Isumaginnittut suliap ingerlaqqinnerani najukkani inuutaasut kommuninilu sulisut pisariaqartinneqartumik ilanngutissagaat soorunami naatsorsuutigivarput. Naalakkersuisunut sumiiffinni tunngaveqarneq isumaqatigiissummi nutaami pingaarutilimmik ilaavoq.
Ataatsimoortumik pillaasarnerup aaqqissuussivigeqqinneqarnerani isumaqatigiissut ilaasutut isigineqassaaq, tassani pinerluttunik isumaginnittut patajaallisaavigineqarnissaannut 2030-p tungaanut 7,5 milliardit koruuninit amerlanerusut naalakkersuisut immikkoortissimavaat. Isumaqatigiissut qallunaat killissarititaat qaangerlugit ammaassimmat aamma naalagaaffeqatigiinnermi tamarmi ataqatigiinnerusumik, piujuartitsisumik aamma naapertuilluartumik pillaasarnermik systemimik pilersitsinissaq anguniarneqarmat, Kalaallit Nunaanni atulersitsinermi erseqqissarneqarpoq.
